دعا

اس دعا کو اسم اعظم بھی کہا گیا ہے

جنوبی ایشیا کے گدھ پر منڈلاتے خطرات

گدھ ماحول کو تعفن اور دیگر جراثیم سے صاف رکھنے کے لیے حیاتیاتی تنوع میں بہت اہم کردار ادا کرتے ہیں مگر گزشتہ چند برسوں کے دوران جنوبی ایشیا میں اس پرندے کی نسل تیزی سے ختم ہوتی جارہی ہے جو کہ ایک تشویشناک امر ہے۔

اس پرندے کی خوراک مردہ جانور کا گوشت اور دیگر باقیات ہوا کرتی ہیں لیکن تکلیف دہ بات یہ ہے کہ موت سے زندگی کشید کرنے والا پرندہ اب اپنی ہی خوراک سے موت کے منہ میں چلا جاتا ہے۔

اس کی ناپید ہوتی نسل کی وجوہات ماہرین کے بقول ایسے مردہ جانوروں کا گوشت ہے جنہیں بیماری کے دوران ڈیکلوفینک کی دوا دی گئی ہوتی ہے۔ اس گوشت سے گدھ کے گردے ناکارہ ہوجاتے ہیں اور وہ موت کا شکار ہوجاتا ہے۔

اس امر کی نشاندہی کے بعد اس دوا کے جانوروں میں استعمال پر خطے کے چار ملکوں پاکستان، نیپال، بھارت اور بنگلہ دیش میں پابندی عائد کردی گئی تھی لیکن اس کے باوجود صورتحال اتنی حوصلہ افزا نہیں۔

تربوز سے موسمی بیماریوں کا خاتمہ

گرمیوں میں تربوز کا استعمال موسم کی شدت کے باعث پیدا ہونے والی بیماریوں کو ختم کرتا ہے۔ ڈاکٹرز کا کہنا ہے کہ گرمیوں میں پانی سے اگر پیاس نہ بجھے تو تربوز اس کے توڑ کا کام کرتا ہے۔

طبی ماہرین کا یہ بھی کہنا ہے کہ پانی سے بھرپور اس پھل کے استعمال سے جسم کو توانائی اورتسکین ملتی ہے جو موسم گرما میں کم ہوتی ہوئی قوت مدافعت کو بڑھا دیتا ہے۔ غذائی اعتبار سے تربوز میں فولاد، نشاستہ دار شکری اجزا اور وٹامنز کی وافر مقدار پائی جاتی ہے جو موسم کی سختی میں نہ صرف صحت کی ضمانت ہے بلکہ خشک کھانسی اور گرمیوں کے بخارکا علاج بھی تربوز کے استعمال میں پنہان ہے۔

روزانہ دانتوں کی صفائی عارضہ قلب سے بچاتی ہے

روزانہ دانتوں کی صفائی انسان کو عارضہ قلب سے بچاتی ہے۔ 

ماہرین طب نے اپنی ایک تحقیق میں کہا ہے کہ روزانہ کی بنیاد پر دانتوں کی مناسب صفائی سے نہ صرف دانت اور مسوڑھے محفوظ رہتے ہیں بل کہ عارضہ قلب میں مبتلا ہونے کے خدشات میں بھی کمی آتی ہے۔ 

برطانیہ کے ڈینٹل ایسوسی ایشن کے ماہرین کے مطابق دانتوں اور مسوڑھوں کی تکلیف میں مبتلا لوگوں میں عارضہ قلب میں عارضہ قلب کے خدشات بڑھ جاتے ہیں اس لئے روزانہ دانتوں کی صفائی ضرور کرنی چاہیے۔

دل کا دورہ اور کھانسی کی شکایت

دل کے دورے کے دوران کھانسی آنے سے مریض کو ہسپتال تک جانے کی مہلت مل جاتی ہے اور اس عمل سے اب تک ہزاروں لوگوں کی جانیں بچ چکی ہیں۔ اس ضمن میں تحقیق پولینڈ کے سیلاسینا میڈیکل سکول میں مکمل ہوئی جس میں ۱۱۵ افراد کا تجزیہ کیا گیا جو صرف کھانسی کے باعث دل کے شدید دورے میں بھی محفوظ رہے۔ اس کے علاوہ ۳۶۵ دیگر مریضوں میں بھی کھانسی کی علامات کے باعث دل کے دورے سے محفوظ رہنے کے شواہد ملے ہیں۔ اس تحقیق کے بعد طبی ماہرین نے کھانسی کے عمل سے دل کے دورے سے بچت کے عوامل پر تحقیق کرنے کا فیصلہ کیا ہے تاکہ دیکھا جا سکے کہ اس میکیزم میں کس طرح دل پھٹنے سے رک جاتا ہے۔

چیونگ گم یادداشت کے لیے خطرناک ہے

مغربی یورپی سائنس دان تین ہزار طلباء کا معائنہ کرکے اس نتیجے میں پہنچے ہیں کہ چیونگ گم یادداشت کے لیے خطرناک ہے۔ طلباء کو دو گروپوں میں منقسم کردیا گیا تھا جن میں سے ایک گروپ کے شرکاء نے معائنہ کے دوران چیونگ گم استعمال کی جبکہ دوسرے گروپ کے شرکاء اس سے گریزاں رہے۔ معلوم ہوا کہ چیونگ گم کا استعمال طلباء کو متوجہ ہونے اور معلومات یاد رکھنے سے روک دیتا ہے۔ مزید برآں سائنس دانوں نے بتایا کہ پیڑ ہلانے اور اونگلیوں سے دستک دینے جیسی بلا سوچے کئے جانے حرکتوں سے بھی یادداشت کے اعمال پر منفی اثر پڑتا ہے۔

چیونگ گم یادداشت کے لیے خطرناک ہے

بیس مارچ کو یوم خوشی قرار دیا گیا

اقوام متحدہ کی جنرل اسمبلی نے بیس مارچ کو یوم خوشی قرار دیا ہے۔ اس تنظیم کے تمام 193 رکن ممالک نے متفقہ طور پر بھوٹان کی متعلقہ تجویز کو منظور کرلیا۔ جنرل اسمبلی کی قرارداد کے مطابق اس تقریب کے موقع پر بالخصوص مختلف تعلیمی پروگرام منعقد کئے جانے ہوں گے۔

سام سنگ گلیکسی نیکسس پر بھی پابندی

امریکی ریاست کیلیفورنیا میں ایک امریکی عدالت نے سام سنگ اور ایپل کے مابین جاری پیٹنٹ کے تنازع کے تصفیے تک ملک میں سام سنگ کے سمارٹ فون گلیکسی نیکسس کی فروخت پر پابندی لگا دی ہے۔

تاہم عدالت نے کہا ہے کہ ان احکام پر عملدرآمد کے لیےایپل کو دس کروڑ ڈالر بطور ضمانت جمع کروانے ہوں گے۔ ضمانت کا مقصد یہ ہے کہ اگر سام سنگ یہ مقدمہ جیت جاتا ہے تو اس پابندی سے ہونے والے نقصان کی تلافی ہوسکے۔

جج لوسی کوح نے اس ہفتے کے آغاز میں سام سنگ کے ٹیبلٹ کمپیوٹر گلیکسی ٹیب 10.1 کی فروخت پر بھی پابندی عائد کی تھی۔

سام سنگ جنوبی کوریا کی ایک انتہائی بڑی الیکٹرونکس کمپنی ہے جس کی مصنوعات دنیا بھر میں بہت مقبول ہیں۔ ان کا کہنا تھا وہ جمعہ کو آنے والے فیصلے سے مایوس ہیں تاہم نیکسس کو صارفین تک پہنچانے کے لیے قانونی کارروائی کے ساتھ ساتھ تمام اقدامات کریں گے۔

دوسری جانب ایپل امریکہ کی مقبول ترین کمپنیوں میں سے ایک ہے جس کے آئی فون نے سمارٹ فون کی دنیا میں تہلکہ مچا دیا تھا۔ آئی پوڈ، آئی فون اور آئی پیڈ کی بے پناہ کامیابی کے بعد ایپل اپنی قدر کے لحاظ سے دنیا کی سب سے بڑی کمپنی ہے۔

ایپل اور سام سنگ دنیا بھر کے ممالک میں پیٹنٹ اور دیگر جملہ حقوق کے سلسلے میں مختلف مقدمات میں ایک دوسرے کے مدمقابل ہیں۔

ایپل کا کہنا ہے کہ سام سنگ نے اس کی مصنوعات کے ڈیزائن کی نقل کی ہے جبکہ سام سنگ کا دعویٰ ہے کہ ایپل مصنوعات میں انٹرنیٹ سے رابطہ قائم کرنے کا طریقہ سام سنگ کا بنایا ہوا ہے۔

 سام سنگ گلیکسی نیکسس پر بھی پابندی

ثانیہ اور بھوپتی کی جوڑی ومبلڈن سے باہر

بھارت کی سٹار ٹینس کھلاڑی ثانیہ مرزا اور مہیش بھوپتی کی جوڑی ومبلڈن کے مکسڈ ڈبلز مقابلوں سے باہر ہوگئی ہے۔ انھیں ایک ان سیڈڈ جوڑی کے ہاتھوں چھ تین اور چھ ایک کے سکور سے سٹریٹ سیٹس میں شکست کا سامنا کرنا پڑا۔

واضح رہے کہ اسی سال ثانیہ مرزا اور مہیش بھوپتی کی جوڑی نے فرنچ اوپن مقابلوں میں مکسڈ ڈبلز کا خطاب حاصل کیا تھا تاہم ومبلڈن میں انھیں دوسرے ہی دور میں شکست کا سامنا کرنا پڑا۔

ثانیہ مرزا اور مہیش بھوپتی کی جوڑی کو ومبلڈن میں پانچواں درجہ دیا گیا تھا لیکن وہ پال ہینلی اور اے کردریاتسیوا کی جوڑی سے شکست کھا گئے۔

بھارت کی یہ جوڑی اپنی لے میں نہیں آسکی اور پہلا گیم چھ تین سے ہارنے کے بعد واپسی نہیں کر سکی اور دوسرا گیم بہت آسانی سے گنوا دیا۔

لندن میں جاری ایک سو چھبیسویں ومبلڈن ٹینس چیمپیئن شپ میں ثانیہ مرزا خواتین کے ڈبلز کے مقابلوں میں ابھی بھی موجود ہیں اور وہ تیسرے راؤنڈ میں پہنچ چکی ہیں۔

ثانیہ اور بھوپتی کی جوڑی ومبلڈن سے باہر

سپاٹ فکسنگ: پانچ بھارتی کرکٹ کھلاڑیوں پر پابندی

بھارتی کرکٹ کٹرول بورڈ نے سپاٹ فکسنگ کے الزامات کے سلسلے میں پانچ کھلاڑیوں پر پابندی عائد کرنے کا اعلان کیا ہے۔ ان میں سےایک پر تاحیات پابندی لگائی گئی ہے۔

پانچ میں سے چار کھلاڑی انڈین پریمئر لیگ کی مختلف ٹیموں سے وابستہ ہیں۔ ایک ٹی وی چینل نے سٹنگ آپریشن کے بعد ان کھلاڑیوں پر فکسنگ کے لیے رضامندی ظاہر کرنے کا الزام لگایا تھا۔

ٹی وی چینل نے ان کھلاڑیوں سے اپنی بات چیت کے ویڈیو بھی نشر کیے تھے جس کے بعد بھارتی بورڈ نے تفتیش کی ذمہ داری اپنے انسداد بدعنوانی یونٹ کے سپرد کردی تھی۔

سزا کا فیصلہ بورڈ کی تادیبی کمیٹی نے کیا ہے جس میں بورڈ کے چیئرمین این سری نواسن اور نائب صدور ارون جیٹلی اور نرنجن شاہ شامل تھے۔

مدھیہ پردیش کے فاسٹ بالر ٹی پی سدھیندرا ( ڈیکن چارچرز) پر تاحیات پابندی عائد کی گئی ہے جبکہ شلبھ شریواستو (کنگز الیون پنجاب) پانچ سال تک کسی بھی قسم کی کرکٹ نہیں کھیل سکیں گے۔ موہنیش مشرا (پونے واریرز)، امت یادو (کنگز الیون پنجاب) اور ابھینو بالی پر ایک ایک سال کے لیے پابندی لگائی گئی ہے۔

بورڈ نے پندرہ مئی کو انکوائری مکمل ہونے تک پانچوں کھلاڑیوں پر عارضی پابندی لگا دی تھی۔ ٹی وی چینل کےانکشافات کے بعد شلبھ شریواستو نے بورڈ سے معافی مانگ لی تھی۔ سبھی کھلاڑیوں نے فکسنگ کے الزامات سے انکار کیا تھا۔

ان میں سے کسی بھی کھلاڑی نے قومی ٹیم کی نمائندگی نہیں کی ہے۔ ٹی سدھیندرا، ابیھنو بالی اور موہنیش بہل کمیٹی کے سامنے پیش ہوئے جبکہ شلبھ شری واستو اور امت یادو نے ٹیلی کانفرنس کے ذریعہ اپنا موقف پیش کیا۔

بی سی سی آئی نے ایک بیان میں کہا ہے کہ ٹی سدھیندرا پر ٹی وی چینل کے نامہ نگاروں سے سپاٹ فکسنگ کے لیے رقم لینے کا جرم ثابت ہوا جس کی وجہ سے انہیں مثالی سزا دی گئی ہے۔

بورڈ کے مطابق شلبھ شریواستو نے میچ فکسنگ کے لیے رضامندی ظاہر کی تھی لیکن نہ انہوں نے کوئی رقم لی تھی اور نہ کسی میچ کے دوران کوئی فکنسگ ہوئی۔ باقی کھلاڑیوں پر کرکٹ کو بدنام کرنے کا جرم ثابت ہوا ہے۔ تمام سزاؤں کا اطلاق پندر مئی سے ہوگا۔


پانچ بھارتی کرکٹ کھلاڑیوں پر پابندی

’پاکستانی سپریم کورٹ نے حد کردی‘

بھارتی سپریم کورٹ کے ریٹائرڈ جج جسٹس مرکھنڈے کاٹجو نے کہا ہے کہ پاکستان کی سپریم کورٹ نے عوام کو خوش کرنے کے چکر میں وزیراعظم کو نااہل قرار دے کر اپنی آئینی حددو کو پار کیا ہے۔

بی بی سی اردو کے ساتھ ایک انٹرویو میں انہوں نے کہا عدلیہ کو ہمیشہ تحمل کا مظاہرہ کرنا چاہیے۔


’پاکستانی سپریم کورٹ نے حد کردی‘

بجلی بچانے کے لیے انوکھی ایجاد

فلپائن میں بجلی بہت مہنگی ہے اور کئی کچی بستیوں کے رہائشی اسے کم سے کم استعمال کرنے کی کوشش کرتے ہیں۔ لیکن اب صرف پانی کی ایک بوتل اور سورج کی روشنی کی مدد سے انہیں اپنے بجلی کے بل کم رکھنے میں بہت آسانی ہوگئی ہے۔

ایک معمولی سی ایجاد فلپائن کے غریب عوام کی زندگیوں میں روشنی بھر رہی ہے۔

کیا آپ نے یا آپ کے آس پاس کسی نے کوئی ایسی انوکھی چیز یا طریقہ ایجاد کیا ہے جو روز مرہ زندگی میں بہت مفید ہو؟

اگر آپ کے آس پاس کسی ایسی انوکھی ایجاد کی مثال موجود ہے تو ہمیں نیچے دیے گئے فورم کے ذریعے اس بارے میں تفصیلی معلومات لکھ بھیجیے۔ اگر آپ کی بھیجی ہوئی معلومات دلچسپ ہوئیں تو ہم آپ سے خود رابطہ کریں گے۔

  بجلی بچانے کے لیے انوکھی ایجاد

پاکستانی ایمپائر علیم ڈار کا ایک اور اعزاز

پاکستان کے علیم ڈار نے کرکٹ کے 150 ایک روز بین الاقوامی میچوں میں ایمپائرنگ کے فرائض انجام دینے والی ساتویں شخصیت ہونے کا اعزاز حاصل کرلیا ہے۔

انٹرنیشنل کرکٹ کونسل کے امارات ایلیٹ پینل سے منسلک 44 سالہ علیم ڈار کو یہ اعزاز انگلینڈ اور آسٹریلیا کے مابین پانچ میچوں کی سریز کے جمعہ کو کھیلے گئے افتتاحی میچ میں حاصل ہوا۔

میچ کے اختتام پر امارات ایلیٹ پینل کے جواگال سریناتھ نے پاکستانی ایمپائر کو آئی سی سی کی طرف سے اعزازی ’نشان‘ پیش کیا۔

علیم ڈار مسلسل تین برسوں سے ڈیوڈ شیپرڈ ٹرافی حاصل کررہے ہیں۔


پاکستانی ایمپائر علیم ڈار کا ایک اور اعزاز

پاکستان کے 334 رنز، ایک کھلاڑی آؤٹ

سری لنکا کے خلاف کولمبو میں جاری دوسری ٹیسٹ کے پہلے دن پاکستانی بلے بازوں نے پراعتماد انداز میں بیٹنگ کرتے ہوئے کھیل کے اختتام پر صرف ایک وکٹ کے نقصان پر تین سو چونتیس رن بنا لیے۔

پاکستانی اننگز کی خاص بات اوپنر محمد حفیظ کی سنچری اور ان کے ساتھیوں توفیق عمر اور اظہر علی کی نصف سنچریاں رہیں۔

توفیق عمر تو پینسٹھ رنز کی اننگز کھیل کر آؤٹ ہوگئے جبکہ کھیل کے اختتام پر محمد حفیظ ایک سو بہّتر اور اظہر علی بانوے رنز پر ناٹ آؤٹ تھے۔

سینچر کو شروع ہونے والے ٹیسٹ میچ میں سری لنکا نے ٹاس جیت کر پاکستان کو پہلے بیٹنگ کرنے کی دعوت دی تو اوپنرز نے ٹیم کو اٹھہتر رنز کا آغاز فراہم کیا۔

اس سکور پر توفیق عمر اینجلو میتھیوز کی گیند پر کپتان جیاوردھنے کے ہاتھوں کیچ ہوگئے۔

ان کی جگہ اظہر علی کھیلنے کے لیے آئے جنہوں نے محمد حفیظ کے ساتھ مل کر نہ صرف سکور میں مسلسل اضافہ کیا بلکہ سری لنکن بلے بازوں کو مزید کامیابی بھی حاصل نہیں کرنے دی۔

اسی دوران محمد حفیظ نے اپنے ٹیسٹ کیریئر کی پانچویں اور سری لنکا کے خلاف پہلی سنچری مکمل کی اور اس اننگز میں انہوں نے بارہ چوکے لگائے۔

اظہر علی نے پانچ چوکوں کی مدد سے اپنی نصف سنچری بنائی۔

تین ٹیسٹ میچوں پر مشتمل سیریز میں سری لنکا کو ایک صفر کی برتری حاصل ہے۔ گال میں کھیلے جانے والے پہلے ٹیسٹ میچ میں سری لنکا نے پاکستان کو دو سو نو رنز سے شکست دے دی تھی۔

اس سے پہلے پاکستان اس دورے پر سری لنکا سے ایک روزہ میچوں کی سیریز تین ایک سے ہار چکا ہے۔


حفیظ کی سنچری، پہلا دن پاکستان کے نام

ہاتھ دھونے سے انسان کے قوت فیصلہ میں آسانی

جدید طبی اور نفسیاتی تحقیق کے مطابق ہاتھ دھونے سے صرف صحت پر ہی مثبت اثرات نہیں ہوتے بلکہ اخلاقی سطح پربھی اس کے اثرات دیکھے گئے ہیں۔ اسلام میں صفائی نصف ایمان اور دیگر مذاہب میں جسم کی صفائی پر اسی لئے زور دیا گیا ہے کہ ہاتھ دھونے سے قوت فیصلہ میں اضافہ ہوسکتا ہے اور انسان خود کو زیادہ پراعتماد محسوس کرتا ہے۔ 

برطانوی سائنس دانوں نے کہا کہ کوئی بھی اہم فیصلہ کرنے سے پہلے اگر ہاتھ دھو لئے جائیں تو فیصلہ کرنے میں آسانی ہوجاتی ہے۔ سائنس دانوں نے جرائم سے متعلق فیصلے کرنے والی جیوری کی سفارش کی ہے کہ وہ اس عمل سے استفادہ کرسکتے ہیں جبکہ ووٹر ووٹ ڈالنے سے پہلے ہاتھ دھولیں تو درست فرد کے انتخاب میں آسانی محسوس کریں گے۔ 

ایک تجربے کے دوران ۲۲ افراد کے ہاتھ دھلا کر اور ۲۲ افراد کے بغیر ہاتھ دھوئے ان کو منشیات کی سمگلنگ پر مشتمل ایک فلم دکھائی گئی۔ فلم دیکھنے کے بعد تمام افراد نے اس فلم کو برا قرار دیا اور سمگلروں کے خلاف قانونی کارروائی کرنے پر زور دیا مگر ہاتھ دھونے والے افراد نے منشیات سمگل کرنے والی وجوہات کو بھی سامنے لانے کی ضرورت پر زور دیا۔ 

یہ تحقیق یونیورسٹی آف پلی ماوتھ کی طبی اور نفسیاتی ماہر ڈاکٹر سیمونی سچنل نے مرتب کی۔ جس کو ۱۰۰ سے زائد مختلف تجربوں کے بعد سامنے لایا گیا تھا۔ اس تحقیق کے نتائج کو لان کیسئر یونیورسٹی کے سائیکالوجسٹ پروفیسر کیری کوپر نے ”خوفناک“ قرار دیتے ہوئے کہا کہ ”واقعی صفائی ہمیں بہت سے غلط فیصلوں سے بچا سکتی ہے‘‘۔

معمولات میں تبدیلی، صحت مند زندگی

ڈاکٹر خالد کاظمی

بہت کم لوگ ایسے ہیں، جو اعصاب شکن مصروفیات کے بعد بھی تروتازہ دکھائی دیتے ہیں۔ عموماً دیکھنے میں آیا ہے کہ اکثریت دفتروں میں زیادہ وقت کرسی پر بیٹھ کر ہی گزارتی ہے۔ ماحول اگر آئیڈیل نہ ہو تو انسان یکسانیت کا شکار ہوجاتا ہے اور طبیعت پر پژمردگی چھا جاتی ہے۔
 

اگر آپ خود پر تھوڑی سی توجّہ دیں تو دفتری کام کاج کے باوجود تروتازہ اور ہشّاش بشّاش رہا جاسکتا ہے۔ سب سے پہلے تو ناشتا بھرپور کیجیے۔ اس کا ایک فائدہ یہ ہو گا کہ جلدی بھوک نہیں لگے گی، دوسرے، آپ چاکلیٹ، چھولے، سنیکس و دیگر غیرضروری چیزوں سے پرہیز کریں۔

ایک اچھے ناشتے سے مراد۔ اناج، دلیہ، دودھ، انڈا وغیرہ ہے۔ اگر کسی وجہ سے ڈاکٹر نے مخصوص چیزوں پر پابندی نہیں لگا رکھی تو آپ اپنی پسند کے مطابق کھانے پینے کی ہر شے استعمال کرسکتے ہیں۔ توانائی حاصل کرنے کے لیے ”دہی“ بھی ایک عمدہ غذا ہے۔جسمانی توانائی کے حصول کے بعد اعصابی توانائی کا حصول باقی رہ جاتا ہے۔ آپ طالب علم ہیں یا ملازمت پیشہ، خاتونِ خانہ ہیں۔ دفتر میں کام کرتے ہیں، دکان دار ہیں یا کسی اور پیشے سے منسلک، آپ جو بھی کام کریں گے، اس میں توانائی تو بہرحال خرچ ہوگی۔ اگر ذہنی کام یا مصروفیات کچھ زیادہ ہیں تو تھکان یا اعصابی تناؤ کا ہونا لازمی امر ہے۔ ذیل میں ہم آپ کے لیے خوش و خرم رہنے کی کچھ ٹپس درج کررہے ہیں۔
 

دفتر میں ممکن ہو تو حرکت کرتے رہیں اور ہر پندرہ، بیس منٹ کے بعد اُٹھ کر پوزیشن تبدیل کرلیں۔ دوستوں اور ساتھیوں سے مختصراً بات چیت بھی کرتے رہیں۔ چپڑاسی سے پانی منگوانے کی بجائے خود پانی لا کر پییں۔ اس طرح خون کی گردش معمول پر رہے گی۔ سب سے بڑھ کر یہ کہ مستقل ایک ہی انداز میں ہرگز بیٹھے نہ رہیں۔ گھنٹوں مسلسل ایک ہی انداز میں بیٹھے رہنے سے آپ زیادہ تھک سکتے ہیں اور آپ کتنے ہی توانا کیوں نہ ہوں، تھکاوٹ بہرحال محسوس کریں گے۔ اگر آپ دفتر میں چل پھر نہیں سکتے تو کھڑے ہوکر، ہاتھوں اور بازوؤں کو ورزش کے انداز میں پھیلا سکتے ہیں۔ مقصد یہ ہے کہ جسم پر چھایا ہوا جمود ٹوٹ جائے۔

دفاتر میں کام کرنے والے خواتین و حضرات کا ایک بڑا مسئلہ یہ بھی ہے کہ ایک جگہ نظر جما کر کام کرنے سے آنکھوں میں تھکاوٹ اور جلن سی محسوس ہونے لگتی ہے۔ اس طرح اعصاب بری طرح متاثر ہوتے ہیں، رفتہ رفتہ بینائی بھی متاثر ہونے لگتی ہے۔ آنکھوں کی قدرتی اور فطری چمک غائب ہوجاتی ہے۔ اس کے لیے ایک پینسل یا پین لیں اور آنکھوں سے تقریباً آٹھ انچ کے فاصلے پر رکھ لیں۔ اس کو دیکھیں، پھر تقریباً پانچ سیکنڈ کے بعد پینسل سے نظریں ہٹا کر کسی دور کی چیز کو دیکھیں۔ یہ عمل کئی بار کریں۔ بار بار کے اس عمل سے آنکھوں کی ہلکی سی ورزش ہوگی اور کچھ ہی دنوں میں آنکھیں پہلے سے زیادہ روشن و چمک دار ہوجائیں گی اور تھکاوٹ بھی نہیں ہوگی۔

اکثر لوگ کرسی پر بیٹھے بیٹھے فربہ ہوجاتے ہیں، خاص طور سے خواتین۔ اکثریت کی رانیں بھدّی ہوجاتی ہیں۔ ان کو معمول پر لانے کے لیے ایک سہل سی ورزش کیجیے۔ کاغذ کا ایک ٹکڑا کرسی پر بیٹھے بیٹھے دونوں رانوں کے درمیان میں دبا لیں اور تقریباً ۲۰سیکنڈ کے بعد رانوں کو ڈھیلا چھوڑ دیں۔ یہ عمل بار بار کیجیے۔ کچھ ہی عرصے میں آپ کی بھدی رانیں سڈول ہوجائیں گی۔ اس کے علاوہ کرسی پر تن کے سیدھے بیٹھیں اور جب بھی محسوس ہونے لگے کہ جُھک رہے ہیں تو پھر سے سیدھے بیٹھنے کی کوشش کریں۔ اس دوران گہری سانسیں لیتے رہیں۔ گہری سانس لینے سے توانائی ذخیرہ ہوتی ہے اور آپ چاق چوبند ہوجاتے ہیں۔

گھر ہو یا دفتر، پانی زیادہ پیئیں، پیاس نہ بھی ہو تو دن بھر میں کم از کم دس بارہ گلاس پانی پینا ضروری ہے۔ پانی جسم کی محض ضرورت ہی نہیں، یہ حسن و دل کشی اور تازگی بھی فراہم کرتا ہے اور گہرے سانس لینے کی عادت سے آکسیجن جسم کے باریک ترین خلیوں میں بہ آسانی پہنچ جاتی ہے جو آپ کو تروتازہ رکھنے میں مدد دیتی ہے۔

چائے خون کا بہاؤ بہتر بناتی ہے

چائے دل کی طرف خون کے بہاؤ کو بہتر بناتی ہے۔ جاپان کے طبی ماہرین نے کہا ہے کہ کالی چائے پینے سے خون کا بہاؤ دل کی جانب بہتر ہوجاتا ہے اور دل کے امراض کے خطرات کم ہوسکتے ہیں۔ اوساکا سٹی یونیورسٹی میں ہونے والی تحقیق میں بتایا گیا ہے کہ کالی چائے کولیسٹرول کی سطح کو نارمل رکھنے، خون میں لوتھٹرے کم کرنے اور خون کی نالیوں کو تنگ ہونے سے بچانے میں اہم کردار ادا کرتی ہے۔

طبی ماہرین نے اس تحقیق کو مکمل کرنے کیلئے ۱۰صحت مند افراد کوچائے پلانے کے بعد ان کی خون کے بہاؤ کو نوٹ کیا تو معلوم ہوا کہ ان کے خون کی گردش پہلے سے زیادہ بہتر ہوگئی ہے۔ جاپانی طبی ماہرین نے اس تجربے کو بنیاد بناکر جب مزید تحقیق کی تو معلوم ہوا کہ کالی چائے نہ صرف دل کی شریانوں کوتنگ ہونے سے روکتی ہے بلکہ انہیں لچکدار اور بہتر بہاؤ کے قابل بھی بناتی ہے۔ اس مقصد کے طبی ماہرین نے الٹرا ساونڈ کی ایک خصوصی تکنیک کو استعمال کیا تھا، جس کو ”سی ایف وی آر“ کہا جاتا ہے۔ طبی ماہرین نے چائے کے ساتھ کیفین ملے دوسرے مشروبات پربھی تجربات کیے تھے مگر چائے کو سب سے مجرب پایا۔


اسی بارے میں مزید

سرطان کی روک تھام کے لیے پاکستانی چائے