گستاخانہ فلم میں کام کرنے والی ہیروئن سنڈی لی گارسیا نے فلمساز، یو ٹیوب اور گوگل کے خلاف امریکی وفاقی عدالت میں درخواست دائر کردی ہے۔ گزشتہ ہفتے لاس اینجلس کی اعلیٰ عدلیہ نے اداکارہ کی درخواست مسترد کردی تھی جس میں استدعا کی گئی تھی کہ یو ٹیوب کو عارضی طور پر اس فلم کو چلانے سے روک دیا جائے۔ اداکارہ نے وفاقی عدالت میں دائر اپنی درخواست میں کاپی رائٹ کی خلاف ورزی کے ساتھ ساتھ فلمساز پر دھوکہ دہی کا الزام بھی عائد کیا ہے۔ گارسیا کے مطابق فلمساز نکولا باسلے نے سام باسیلی کے فرضی نام سے کام کیا اور مجھے اور دیگر اداکاروں کو دھوکا دیا کہ ہم صحرائی جنگجو نامی فلم میں کام کررہے ہیں۔ انہوں نے مزید بتایا کہ میرے ڈائیلاگ پر ڈبنگ بھی کی گئی۔ اداکارہ نے کہا کہ اس سے ایسا لگتا ہے کہ فلم میں سب کچھ میں نے خود سے کیا، اس کے بعد میری زندگی کو خطرات لاحق ہوگئے ہیں۔
