آئرلینڈ کی آسٹریلیا کے ہاتھوں شکست

سری لنکا میں کھیلے جا رہے ٹی ٹوئنٹی عالمی کپ کے دوسرے میچ میں بدھ کو آسٹریلیا نے آئرلینڈ کو باآسانی شکست دے دی ہے۔ آئرلینڈ کی ٹیم نے اس میچ میں ٹاس جیت کر پہلے کھیلنے کا فیصلہ کیا اور مقررہ 20 اوور میں 123 رن بنائے۔ آسٹریلیا نے 124 رنز کا ہدف صرف 15 اوور میں 3 وکٹوں کے نقصان پر حاصل کر لیا۔ آسٹریلیا کے اوپنگ بلے باز شین واٹسن نے 30 گیندوں پر 51 رن سکور کیے جبکہ دوسرے اوپنگ بلے باز وارنر نے 23 گیندوں پر 26 رن بنائے۔

قبل ازیں آئرلینڈ کی اننگز کا آغاز اچھا نہیں رہا اور اس کے 2 کھلاڑیوں صرف 15 کے مجموعی سکور پر آؤٹ ہوگئے۔ 44 کے سکور تک پہنچتے پہنچتے اس کے 4 کھلاڑی آوٹ ہوچکے تھے۔ 4 کھلاڑیوں کے آوٹ ہونے کے بعد آئرلینڈ کی اننگز کو ذرا استحکام ملا اس کا سکور 85 رن تک جا پہنچا جہاں اس کی پانچویں وکٹ گری۔ کے جی اوبرائن آئرلینڈ کی طرف سے کامیاب بلے باز رہے اور انہوں نے 35 رن 29 گیندوں پر بنائے۔ آسٹریلیا کی طرف سے واٹسن نے 26 رن دے کر تین اور سٹارک نے 20 رن دے کر دو کھلاڑیوں کو آوٹ کیا۔

اب تک ٹی ٹوئنی ورلڈ کپ میں صرف ایک میچ ہوا ہے جس میں سری لنکا نے زمبابوے کو آسانی سے ہرا دیا تھا۔ بدھ کو ٹی ٹوئنی کے تیسرے میچ میں بھارت کا مقابلہ افغا نستان سے ہو رہا ہے۔

آئرلینڈ کی آسٹریلیا کے ہاتھوں شکست