بارش سے بجلی

روس کے مغربی صوبہ کالینن گراد سے تعلق رکھنے والے سکول کے طالب علم انور کُربانوو نے بارش کے پانی سے چلنے والے بجلی گھر کا پروجیکٹ تیار کیا ہے۔ ان کے آبائی علاقے میں بارش بہت زیادہ ہوتی ہے اس لیے مقامی ماہرین توانائی نے اس پروجیکٹ مین بہت دلچسپی ظاہر کی ہے۔

انور کا کہنا ہے کہ ان کا مقصد بارش کو توانائی کے متبادل ذریعہ کے طور پر استعمال کرنے کے امکان کا جائزہ لینا ہے۔ انور نے ایک پرانی سائکل، چند پلاسٹک بوتلیں اور ایک کرسی کے ٹکڑے لے کر اپنی بجلی گھر کا ماڈل بنا لیا ہے۔ یہ کام سرانجام دینے میں ان کو ایک مہینہ لگا۔ یہ ماڈل اس طرح چلتا ہے: پانی کی نلی سے ایک ٹیوب نکال کر اس میں چند چھوٹے چپو لگائے گئے ہیں جن پر گھر کی چھت سے بارش کا پانی گرتا ہے۔ جنریٹر کے ذریعے پانی کی توانائی کو بجلی میں تبدیل کیا جاتا ہے اور کرنٹ وجود میں آتا ہے۔ انور کربانوو کے بنائے گئے اس چھوٹے بجلی گھر کے ذریعے ہر ماہ سترہ کلو واٹ بجلی پیدا کی جا سکتی ہے۔

انور نے ماہ جولائی میں منعقدہ EXPO-SCIENCES EUROPE کے نام سے نمائش میں اپنی یہ ایجاد متعارف کرائی۔ نمائش میں تیئیس ممالک سے تعلق رکھنے والے چار سو بیس نوجوان موجدوں نے حصہ لیا، شرکاء کی عمر بارہ تا پچیس سال تھی۔ انور کربانوو نے ایک مخزن برق (accumulator) اس نمائش میں پیش کیا جس کو بارش کے پانی سے پیدا کردہ بجلی سے جارج کیا گیا تھا۔ یوں نمائش کے دوران انور نے اس آلے کے ذریعے تین سو سیل فونز کو چارج کیا۔

اس نوجوان روسی موجد کا منصوبہ ہے کہ اپنی اس ایجاد کو بہتر بنائے تاکہ اسے دور دراز علاقوں میں بجلی پیدا کرنے کے لیے استعمال کیا جا سکے۔ یوں اس ایجاد کی بنا پر ایک منافع بخش کمرشل پروجیکٹ شروع کیا جا سکتا ہے۔ شروع میں انور اپنے سکول کے قریب بارش کے پانی سے چلنے والا ایک اصل بجلی گھر تعمیر کرنا چاہتے ہیں۔ وہ اندازہ لگا چکے ہیں کہ اخراجات پوری کرنے کے لیے بارش والے باون دنوں کی ضرورت ہے۔ اس کے بعد اس بجلی گھر میں مفت بجلی پیدا کرنے لگے گا بلکہ اس سے ماحولیات کو بالکل بھی نقصان نہیں ہوگا۔

دریں اثناء مذکورہ نمائش کے دوران سپین، ناورے اور الجزائر نے انور کی ایجاد میں دلچسپی ظاہر کی۔

بارش سے بجلی

امی ملکہ سے تعارف

اِنا کووالینکو کو ”امی ملکہ“ کا خطاب دیا گیا

دنیا کی ایک حسین ماں سائبریا کے شہر Irkutsk میں رہتی ہے۔ اس بارے میں پتہ ماہ اکتوبر کے آخر میں چل گیا جب مالٹا میں بین الاقوامی بیوٹی کانٹیسٹ QUEEN OF THE PLANET 2012 منعقد کیا گیا۔ اس مقابلے میں یورپ اور ایشیا کے انیس ممالک سے تعلق رکھنے والی پچاس شادی شدہ خواتین نے حصہ لیا۔ جیوری ایک ہفتے تک ان کے بارے میں معلومات حاصل کرتی رہی اور ان کی خوبیوں کا جائزہ لیتی رہی۔ آخرکار لتھاوانیہ کی اٹھائیس سالہ حسینہ Aliona Vasilayte کو ”کرہ ارض کی ملکہ“ قرار دیا گیا اور سائبریا کی رہنے والی Inna Kovalenko کو ”امی ملکہ“ کا خطاب دیا گیا۔

اِنا کووالینکو کی عمر 43 سال ہے لیکن وہ کہیں زیادہ جوان لگتی ہیں۔ اس میں ورزش اور موسیقی سے ان کے لگاؤ کا بڑا کردار ہے۔ مزید برآں اِنا کو ہسپانوی لوک رقص فلامینکو کا بھی بہت شوق ہے حتٰی کہ وہ یہ رقص پیش کرنے کے لیے درکار خصوصی جوتے خریدنے کے لیے سپین کے دارالحکومت میڈرڈ گئیں۔ جہاں تک فلامینکو کے لیے پیراہن کا سوال ہے تو اِنا کے پاس ایسے دسیوں پیراہن ہیں۔ اِنا نے بتایا کہ ”میں نے مالٹا میں ہوئے مقابلے میں بھی فلامینکو رقص پیش کیا ہے، میرا خیال ہے کہ یہ رقص دیکھ کر ہی جیوری کے اراکین نے مجھے اعزازی خطاب دینے کا فیصلہ کیا ہوگا“۔ اِنا کا کہنا ہے کہ انہیں بچپن سے تاج پہننے کا شوق ہے لیکن انہیں توقع نہیں تھی کہ کبھی انہیں ایک اصل تاج پہنایا جائے گا۔ اِنا کو حسن برقرار رکھنے کے علاوہ نسوانی صحت کا تحفظ کرنا بھی آتا ہے کیونکہ وہ نسوانی مرضیات کی ڈاکٹر ہیں۔ اِنا نے فخر کے ساتھ کہا کہ ”میرا پیشہ دنیا میں اہم ترین پیشہ ہے کیونکہ میں ماں بننے میں عورتوں کو مدد دیتی ہیں۔ میں بہت چاہتی ہوں کہ تمام عورتوں کو ممتا میں خوشی نصیب ہو، کہ وہ حسین ہوں اور ان کی قدر کی جائے“۔

اِنا کی دو بیٹیاں بین الاقوامی مقابلے میں اپنی ماں کی کامیابی پر بہت خوش ہیں۔ بڑی بیٹی اس وقت سینٹ پیٹرزبرگ کی یونیورسٹی میں زیر تعلیم ہے اور چھوٹی بیٹی سکول کی طالبہ ہے۔ درحقیقت اِنا بذات خود بھی پڑھائی کا سلسلہ جاری رکھے ہوئے ہیں۔ بہت جلد وہ علم طب میں پی ایچ ڈی کے مقالے کی تیاری مکمل کرنے والی ہیں۔

امی ملکہ سے تعارف

ریچھ 6 ماہ کی نیند کے لئے تیار

سردی شروع ہونے کے ساتھ ساتھ روسی علاقے یورال کے شہر ایکاترنبرگ کے چڑیا گھر میں ریچھوں کے لئے سونے کا وقت آگیا ہے- سرد آب و ہوا والے ممالک میں ریچھ سال میں چھہ مہینے جا گتے ہیں اور چھہ مہینے نیند کی حالت میں گزارتے ہیں۔ 

ماہرین حیوانات کے مطابق شہر ایکاترنبرگ کے چڑیا گھر میں رہنے والے مختلف انواع کے ریچھوں نے سو جانے سے پہلے اپنے بدن میں کافی زیادہ چربی اکٹھی کر لی ہے۔ اس وقت یہ ریچھ نسبتاً کم کھانا کھا رہے ہیں، وہ گوشت، مچھلی اور ترکاریوں کی بجائے دلیہ اور روٹی کو ترجیح دینے لگے ہیں۔ ایکاترنبرگ کے چڑیا گھر کے کارکنوں نے صحافیوں کو بتایا کہ زیادہ تر ریچھ دراصل نیم خوابی کی حالت میں پڑ چکے ہیں اور وہ اپنی ماندوں سے نکلنا پسند نہیں کرتے۔

ایکاترنبرگ چڑیا گھر میں ریچھ سرمائی نیند کے لئے تیار

بھارتی سٹے بازوں کو قابو کرنے کی ضرورت

آئی سی سی کے سابق صدر احسان مانی کا کہنا ہے کہ بھارتی سٹے بازوں پر قابو پائے بغیر کرکٹ میں بدعنوانی ختم کرنا ممکن نہیں اور اس ضمن میں آئی سی سی بھارتی کرکٹ بورڈ کے سامنے کمزور دکھائی دیتی ہے۔ احسان مانی نے بی بی سی کو دیے گئے انٹرویو میں کہا کہ غور طلب بات یہ ہے کہ پچھلے بیس برسوں میں میچ فکسنگ کے جتنے بھی کیس سامنے آئے ہیں ان میں بھارتی تعلق ہی دکھائی دیتا ہے۔

گذشتہ دنوں منظرِعام پر آنے والی برطانوی صحافی کی کتاب میں بھی انکشافات ایک بھارتی سٹے باز کی فراہم کردہ معلومات کی بنیاد پر کیے گئے ہیں۔

احسان مانی نے کہا کہ ضرورت اس بات کی ہے کہ آئی سی سی، بی سی سی آئی اور پی سی بی ان انکشافات کے بعد برطانوی صحافی سے ثبوت طلب کریں اور اگر ان الزامات میں کوئی سچائی ہے تو تحقیقات کی جائیں ورنہ لندن کی عدالت میں اس صحافی کے خلاف عدالتی چارہ جوئی کی جائے۔ احسان مانی کا کہنا ہےکہ اگر وہ اس وقت آئی سی سی کے صدر ہوتے تو فوراً بھارتی حکومت سے بات کرتے اور اس سے کہتے کہ چونکہ سٹے بازی کا سب سے بڑا مرکز بھارت ہے اور اسے وہاں کوئی قانونی حیثیت حاصل نہیں ہے، لہٰذا ان سٹے بازوں کو کنٹرول کیا جائے کیونکہ یہ بھارت کا نام بدنام کررہے ہیں۔

احسان مانی نے کہا کہ آئی سی سی کی بے بسی کا اندازہ اس بات سے لگایا جاسکتا ہے کہ وہ کرکٹ کرپشن میں بھارتی تعلق کے بار بار سامنے آنے کے باوجود کچھ بھی نہیں کر پا رہی ہے۔ سٹے بازوں کے خلاف قدم اٹھانے کے لیے کوئی بھی تیار نہیں ہے۔ احسان مانی نے کہا کہ برطانوی صحافی ایڈ ہاکنز کی اس بات میں کوئی وزن نہیں کہ سپاٹ فکسنگ کے مقدمے کے جج جسٹس کک کو کرکٹ کی کوئی سمجھ نہیں تھی۔ انہوں نے کہا کہ جج حضرات مختلف نوعیت کے مقدمے سنتے ہیں اور ظاہر ہے کہ وہ ہر شعبے سے تعلق نہیں رکھتے لیکن وہ قانون سمجھتے ہیں اور انہیں شواہد کی بنیاد پر فیصلہ کرنا آتا ہے، لہٰذا برطانوی صحافی کا اعتراض کوئی معنی نہیں رکھتا۔ دراصل یہ کرکٹ کا مقدمہ نہیں تھا، کرپشن کا مقدمہ تھا جس کا فیصلہ جسٹس کک نے دیا۔

اظہر الدین کو بھارتی عدالت سے کلیئر کیے جانے کے بارے میں احسان مانی کا کہنا ہے کہ سلیم ملک اور اظہر الدین کے مقدمات میں پی سی بی اور بی سی سی آئی نے دلچسپی نہیں لی شاید اس لیے کہ انہیں پتا تھا کہ ان دونوں کی بین الاقوامی کرکٹ ختم ہوگئی ہے۔ انھوں نے وضاحت کرتے ہوئے کہا کہ یہ دونوں کرکٹر چاہیں تو اپنے کریئر ختم کیے جانے پر آئی سی سی اور اپنے کرکٹ بورڈوں کے خلاف عدالت سے رجوع کرسکتے ہیں لیکن وہ ایسا نہیں کریں گے کیونکہ انہیں پتا ہے کہ آئی سی سی اور کرکٹ بورڈوں کے پاس ان کے خلاف ثبوت موجود ہیں۔

بھارتی سٹے بازوں کو قابو کرنے کی ضرورت

کک کی سنچری... میچ بھارت کی گرفت میں

بھارت کے خلاف احمد آباد میں جاری پہلے کرکٹ ٹیسٹ میچ میں انگلش ٹیم کپتان الیسٹر کک کی عمدہ بلے بازی کی بدولت اننگز کی شکست سے دوچار ہونے سے بچنے میں کامیاب رہی ہے تاہم میچ پر اب بھی بھارت کی گرفت مضبوط ہے۔ چوتھے دن کھیل کے اختتام پر انگلینڈ نے دوسری اننگز میں پانچ وکٹ کے نقصان پر 340 رنز بنائے اور اسے بھارت پر دس رنز کی برتری حاصل ہوئی ہے۔

الیسٹر کک نے میچ کے چوتھے دن اپنی سنچری مکمل کی جب کھیل ختم ہوا تو وہ 168 رنز بنا کر کریز پر موجود تھے جہاں ان کا ساتھ میٹ پرائر دے رہے ہیں۔ ان دونوں بلے بازوں کے درمیان چھٹی وکٹ کے لیے 141 رنز کی شراکت ہو چکی ہے۔ اتوار کو انگلینڈ نے بغیر کسی نقصان کے 111 رنزسے اپنی دوسری اننگز دوبارہ شروع کی تو بارہ رن کے اضافے کے بعد اسے نک کامپٹن کی وکٹ کی صورت میں پہلا نقصان اٹھانا پڑا۔ انہیں ظہیر خان نے ایل بی ڈبلیو کیا۔ دوسری انگلش وکٹ 156 کے سکور پر اس وقت گری جب جوناتھن ٹروٹ کو پرگیان اوجھا نے دھونی کے ہاتھوں کیچ کروا دیا۔ چار رن بعد اوجھا نے ہی کیون پیٹرسن کو بولڈ کر کے اپنی ٹیم کو تیسری کامیابی دلوائی۔ انگلینڈ کی چوتھی اور پانچویں وکٹ 199 کے سکور پر گری جب امیش یادو نے لگاتار دو گیندوں پر ایئن بیل اور سمت پٹیل کو پویلین کی راہ دکھلائی۔

سمت پٹیل امپائر کے غلط فیصلے کا نشانہ بنے اور انہیں اس وقت ایل بی ڈبلیو قرار دیا گیا جب ری پلے میں گیند واضح طور پر ان کے بلے سے ٹکراتی دکھائی دے رہی تھی۔ اس میچ میں بھارت نے اپنی پہلی اننگز آٹھ وکٹوں کے نقصان پر 521 رنز بنا کر ڈیکلئیر کر دی تھی۔ اس اننگز کی خاص بات چیتیشور پجارا کی ناقابلِ شکست ڈبل سنچری اور وریندر سہواگ کی طوفانی سنچری تھی۔ اس کے جواب میں انگلش بلے باز بھارتی سپنرز کا مقابلہ کرنے میں بری طرح ناکام رہے اور پوری ٹیم صرف 191 رنز بنا کر آؤٹ ہوگئی تھی۔ انگلینڈ کو فالو آن کرانے میں بھارتی بولر پرگیان اوجھا نے اہم کردار ادا کیا۔ انہوں نے 45 رنز دے کر پانچ کھلاڑی آؤٹ کیے۔

کک کی سنچری مگر میچ بھارت کی گرفت میں

غزہ: اسرائیلی فوجی کارروائی کا بد ترین دن... 26 افراد ہلاک

غزہ پر اسرائیلی حملوں کے چھٹے دن کے آغاز میں غزہ میں اسرائیلی بمباری کے نتیجے میں دو فلسطینیوں کے ہلاک ہونے کی اطلاع ہے جس سے مجموعی طور پر اب تک 71 افراد ہلا ک ہو چکے ہیں کن میں کئی کم سن بچے بھی شامل ہیں۔

اتوار کے روز 26 افراد ہلاک ہوئے جن میں سے الدالو خاندان کے چار بچوں سمیت گیارہ افراد شامل ہیں۔

بی بی سی کے وائر ڈیویس نے بتایا کہ غزہ میں ڈاکٹروں کے مطابق پچھلے چار دنوں میں ہلاک ہونے والوں میں سے پچاس فیصد تک عام شہری ہیں۔

مقامی ذرائع نے بی بی سی عربی سروس کو بتایا کہ غزہ شہر کے النصر علاقے میں ایک تین منزلہ عمارت پر حملے کے نتیجے میں دس فلسطینی ہلاک ہوئے جن میں تین خواتین اور چھ بچے شامل تھے۔ تین فلسطینی شجاعیہ کے علاقے میں جبکہ جبلیہ کے علاقے میں ایک فلسطینی اپنی کار میں ہلاک ہوا۔

صحافیوں کی عالمی تنظیم ’رپورٹرز ساں فرانٹئرز‘ یعنی سرحدوں کے بغیر رپورٹرز نے فوری طور پر مطالبہ کیا ہے کہ ان حملوں کو فوری بند کیا جائے۔ اس تنظیم نے کہا کہ نو صحافی ایک حملے کی نتیجے میں زخمی ہوئے ہیں جس کی وجہ سے ان کا کام متاثر ہوا۔

اسرائیلی افواج کے مطابق انہوں نے سوموار کے دن کے آغاز کے وقت غزہ میں عمارتوں پر لگے اینٹیناز کو نشانہ بنایا جن کی مدد سے ان کے مطابق حماس مبینہ طور پر اپنے جنگجوؤں سے رابطہ میں رہتا ہے۔ گزشتہ روز فضائی حملوں کے ساتھ ساتھ بحری جہازوں سے بھی میزائل داغے گئے جن کے نتیجے میں غزہ میں پچیس افراد کے ہلاک ہوئے۔ جبکہ اسرائیلی وزیراعظم بنیامن نتنیاہو کا کہنا ہے ان کا ملک غزہ میں اپنی کارروائیوں میں ’قابلِ ذکر‘ اضافے کے لیے تیار ہے۔

فلسطینی علاقے سے اسرائیل پر راکٹ حملوں کا سلسلہ بھی جاری رہا مگر اس میں کافی کمی نظر آئی۔ ’پلر آف ڈیفینس‘ نامی اسرائیلی کارروائی میں اب تک مجموعی طور پر اکہتر افراد ہلاک ہو چکے ہیں جبکہ حماس کی جانب سے اسرائیل پر راکٹ حملوں کے نتیجے میں تین اسرائیلی ہلاک ہوئے ہیں۔

متحارب فریقین کے ذرائع نے بی بی سی سے بات کرتے ہوئے تصدیق کی ہے کہ جنگ بندی کی کوششیں جاری ہیں۔

غزہ کے رہائشی یوسف اپنے اٹھارہ ماہ کے بچے ریاد 

کو دفن کرنے جا رہے ہیں

برطانوی وزیرِ خارجہ ولیم ہیگ نے متنبہ کیا ہے کہ اگر اسرائیل غزہ میں زمینی کارروائی کرتا ہے تو اسے عالمی حمایت سے ہاتھ دھونا پڑ سکتے ہیں۔ تاہم سکائی نیوز سے بات کرتے ہوئے ان کا یہ بھی کہنا تھا کہ اس حالیہ تنازع کی اصولی ذمہ داری حماس پر ہی عائد ہوتی ہے۔

اسرائیلی وزیراعظم نے اتوار کو کابینہ کے اجلاس سے خطاب کے دوران کہا ہے کہ اسرائیلی فوج کسی بھی کارروائی کے لیے تیار ہے۔ ’اسرائیلی ڈیفینس افواج اس آپریشن کے دائرۂ کار میں قابلِ ذکر اضافے کے لیے تیار ہیں‘۔

تازہ اسرائیلی حملوں میں ذرائع ابلاغ کی دو عمارتیں بھی نشانہ بنی ہیں اور ان حملوں میں آٹھ فلسطینی صحافی زخمی ہوئے ہیں۔ اسرائیلی فوج نے بی بی سی سے بات کرتے ہوئے کہا ہے کہ وہ ان عمارتوں میں سے ایک میں غیر ملکی صحافیوں کی موجودگی سے آگاہ تھے اور وہ ان کا ہدف نہیں تھے۔ اسرائیل نے حماس اور اسلامی جہاد کے ریڈیو سٹیشنز کی بندش بھی کر دی ہے۔ ٹوئٹر پر شائع ہونے والے پیغام میں اسرائیلی فوج نے کہا ہے کہ انہوں نے صرف ایک انٹینا سمیت مخصوص ساز و سامان کو نشانہ بنایا تاہم روسی ٹی وی نیٹ روک رشیا ٹوڈے کے مطابق حملے میں ان کے دفتر کو نقصان پہنچا ہے۔ حملے میں نشانہ بننے والی عمارتوں میں سے ایک حماس کے ٹی وی سٹیشن القدس کے علاوہ سکائی نیوز اور آئی ٹی این کے بھی زیرِاستعمال تھی۔ اسی عمارت میں ایک سال قبل تک بی بی سی کا دفتر بھی تھا۔

غزہ میں طبی حکام کا کہنا ہے کہ پانچ روزہ اسرائیلی کارروائی میں اب تک گیارہ بچوں سمیت باون فلسطینیوں کی ہلاکت کی تصدیق ہو چکی ہے جبکہ ورلڈ ہیلتھ آرگنائزیشن نے کہا ہے کہ غزہ میں ہسپتال زخمیوں سے بھرے ہیں اور ان ہسپتالوں میں طبی سپلائی کم پڑ رہی ہے۔

اتوار کو اسرائیل کے تجارتی صدر مقام سمجھے جانے والے شہر تل ابیب میں مسلسل چوتھے دن بھی راکٹ حملوں سے متنبہ کرنے والے سائرن بجائے جاتے رہے۔ اسرائیلی پولیس کے مطابق شہر پر داغے گئے دو راکٹ حفاظتی نظام کی مدد سے تباہ کیے گئے ہیں۔ تاہم غزہ سے داغا گیا ایک راکٹ اشکیلون میں ایک رہائشی عمارت پر گرا جس سے متعدد افراد زخمی ہوئے جبکہ عمارت کو بھی نقصان پہنچا۔ ہفتے اور اتوار کی درمیانی شب کو بی بی سی کے نامہ نگار نے بتایا تھا کہ غزہ میں ایک درجن سے زیادہ دھماکے سنائی دیے۔ ان کے مطابق یہ میزائل جنگی بحری جہازوں سے فائر کیے گئے تھے۔ اسرائیل کے وزیر داخلہ ایلی یشئی نے اسرائیلی اخبار سے بات کرتے ہوئے کہا ہے ’آپریشن پلر آف ڈیفنس کا مقصد غزہ کو پتھر کے زمانے میں واپس بھیجنا ہے۔ اور پھر ہی اسرائیل میں اگلے چالیس سال تک سکون رہے گا۔‘

غزہ: اسرائیلی فوجی کارروائی کا بد ترین دن

بوڑھے سے شادی سے انکار، والد کا لڑکی پر تشدد

بوڑھے شخص سے زبردستی سے شادی انکار پر لڑکی کو قتل کرنے کی کوشش، لڑکی تھانے پہنچ گئی۔۔۔ تشدد کی وجھ سے نوجوان لڑکی کی حآلت خراب ہو گئی تشویشناک حالت میں ہسپتال منقتل داخل کرا دیا گیا۔

ڈھرکی کے نواحی گاؤں صوبیدار مجید اعوان کی رہائشی روبینھ اعوان کی شادی اس کے والد لالچ میں آکر ایک بوڑھے شخص سے کر رہے تھے۔۔۔ کہ لڑکی کے انکار پر اس گھر میں قید کر کے سخت تشدد کا نشانہ بنایا گیا۔۔۔ لڑکی جان بچا کر ڈھرکی تھانھ پہنچ گئی۔۔۔ جہاں پولیس نے اسے اپنی تحویل میں لے لیا۔۔۔ تشدد کے باعث روبینھ اعوان بے ھوش ہو گئی جسے تشویش ناک حآلت میں نجی ہسپتال منقتل کیا گیا۔۔۔۔ ہسپتال میں پولیس تعینات ہے اور ملزمان کی گرفتاری کے لیے ٹیمیں روانہ کردی گئی ہیں۔۔۔ ایس ایچ او ڈھرکی کےمطابق لڑکی کو پیر کے روز عدالت میں پیش کیا جائے گا۔

بوڑھے سے شادی سے انکار، والد کا لڑکی پر تشدد

یوراگوئے کا صدر چھوٹے گھر کا مکین

دنیا بھرمیں عظیم الشان محلوں میں رہنے والے اور بڑی بڑی گاڑیوں میں سفر کرنے والے صدور کی اس بھیڑ میں ایک صدر ایسا بھی ہے جو ٹوٹے پھوٹے گھر میں رہتا اور کنویں سے پانی بھرتا ہے۔

یوراگوئے کے صدر ”جوز موجیکا“ کو دنیا کا غریب ترین صدر کہا جاتا ہے۔ وہ چھوٹےسے پرانے گھر میں رہتے اور اپنی تنخواہ کا زیادہ حصہ خیرات کر دیتے ہیں۔ ان کے کپڑے دھونے کی جگہ بھی گھر سے باہر ہے اور انہیں پانی بھی کنویں سے بھرنا پڑتا ہے۔ یہ نرالا صدر سیکیورٹی سے بھی بے نیاز ہے۔ ان کے گھر پر صرف دو پولیس اہلکار اور تین کتے تعینات ہیں۔ 

جوزموجیکا نے حکومت کی جانب سے دی گئی مراعات کو خود ٹھکرایا اور اپنی بیوی کے گھر میں رہنا پسند کیا ہے۔ صدر اور ان کی اہلیہ گھر کے سامنے کھیتوں میں خود کام کرتے اور پھول اگاتے ہیں۔ ان کی تنخواہ بارہ ہزار امریکی ڈالر بنتی ہے تاہم وہ اس کا بیشتر حصہ غریبوں میں بانٹ دیتے ہیں۔ خیرات کے بعد ان کے پاس سات سو پچھتر ڈالر بچتے ہیں جنہیں وہ اپنے لئے کافی قرار دیتے ہیں۔ صدر کی سالانہ آمدنی ایک ہزار آٹھ سو ڈالر ہے جو انیس سو ستّاسی میں خریدی گئی ان کی گاڑی کی قیمت کے برابر ہے۔ 

جوز موجیکا کہتے ہیں اگر آپ کے پاس زیادہ دولت نہیں ہے تو آپ خود کو زیادہ وقت دے سکتے ہیں۔ ان کا کہنا ہے کہ مجھے غریب ترین صدر کہا جاتا ہے لیکن مجھے کبھی غربت کا احساس نہیں ہوا، غریب وہ ہیں جو مہنگا طرز زندگی اپنانے کے لئے کام کرتے اور مزید سے مزید کی خواہش رکھتے ہیں۔
 

یوراگوئے: ایک چھوٹا سا گھر، دنیا کے غریب ترین صدر کا مسکن

مسٹر بین کی ریٹائرمنٹ

خاموشی کے ساتھ دلچسپ حرکتیں کر کے قہقے بکھیرنے والے معروف برطانوی کامیڈین روّن ایٹکنسن مسٹر بین کے کردار کو خیر آباد کہہ رہے ہیں۔ ایٹکنسن کے مطابق وہ عمر کے اس حصے میں ہیں جہاں انہیں بچکانہ حرکتیں زیب نہیں دیتیں۔

مسٹر بین کے ذریعے شہرت کی بلندیوں کو چھونے والے ایٹکنسن نے ان دنوں اپنی توجہ تھیٹر پر مرکوز کی ہوئی ہے جہاں وہ ویسٹ اینڈ نامی ڈرامے میں قدرے سنجیدہ کردار نبھا رہے ہیں۔ 

برطانوی اخبار ٹیلی گراف کے مطابق اب وہ مسٹر بین کے مزاحیہ کردار میں کم ہی نظر آئیں گے۔

مسٹر بین کی ریٹائرمنٹ

پاکستانی سپنر کو آسٹریلیا کا مستقل ویزہ مل گیا

سڈنی: جنوبی افریقہ کے خلاف ٹیسٹ سیریز سے قبل آسٹریلوی ٹیم کو تیاریوں میں مدد فراہم کرنے والے پاکستان کے لیگ سپن باؤلر اور ملک میں پناہ کے درخواست گزار فواد احمد کو مستقل ویزہ دے دیا گیا ہے۔ فواد 2010 میں افغان سرحد سے ملحقہ علاقے سے کرکٹ کھیلنے کے لیے محدود مدت کے ویزے پر آسٹریلیا آئے تھے۔ انہیں جمعرات کو امیگریشن کے وزیر کرس براؤن کی ذاتی مداخلت پر مستقل ویزہ دیا گیا۔ امیگریشن کے ترجمان نے بتایا کہ کرس براؤن نے ذاتی طور پر فواد کے کیس میں دلچسپ لی اور انہیں ملک میں رہنے، کام کرنے اور کرکٹ کھیلنے کے لیے مستقل بنیادوں پر ویزاہ دیا گیا۔

تیس سالہ احمد پہلے کہہ چکے ہیں کہ کرکٹ کھیلنے کی وجہ سے انہیں پاکستان میں شدت پسدنوں سے خطرہ تھا کیونکہ ان کے نزدیک کھیل کے ذریعے مغربی اقدار کو فروغ ملتا ہے۔ ایڈ کوؤن کے اصرار پر آسٹریلیا نے جنوبی افریقہ کے لیگ سپنر عمران طاہر کے خلاف موثر انداز میں کھیلنے کے لیے فواد کو نیٹس میں بیٹنگ پریکٹس کے لیے استعمال کیا تھا۔ 

یاد رہے کہ فواد اور طاہر پاکستان میں قیام کے دوران ڈومیسٹک کرکٹ میں ایک دوسرے کے خلاف کھیل چکے ہیں۔ فواد کے استاد اور دوست کوؤن کا کہنا ہے کہ ’ہم سب اس کی داستان سے بہت متاثر ہیں اور ہمیں فخر ہے کہ وہ کتنا آگے آیا ہے‘۔ ٹی ٹوئنٹی بگ بیش لیگ اور سٹیٹ کی سطح پر کھیلنے کے خواہش مند فواد نے ویزہ ملنے پر بے حد خوشی کا اظہار کیا ہے۔ ’میں حکومت اور ہر اس شخص کا شکر گزار ہوں جس نے میری درخواست میں مدد کی، میں بے حد خوش ہوں‘۔ کرکٹ آسڑیلیا کے سربراہ جیمز سدرلینڈ نے وزیر کرس براؤن کے فیصلے کو کرکٹ کے لیے شاندار قرار دیا ہے۔

پاکستانی اسپنر کی درخواست قبول

ہیکر گروپ ”اینونیمس“ نے اسرائیلی سائٹوں کو نشانہ بنایا

ہیکر گروپ ”اینونیمس“ نے غزہ پٹی میں اسرائیلی فوجی کارروائی کے خلاف احتجاج کے اظہار کے طور پر دسیوں اسرائیلی سائٹوں کو نشانہ بنایا ہے۔ گروپ کے اعلان نامہ کے مطابق ستائسی سائٹوں کو ہیک کر دیا گیا ہے جن پر فلسطین اور تحریک حماس کی حمایت میں تحریریں دیکھنے میں آئیں۔ 

گروپ ”اینونیمس“ نے اس آپریشن کو OpIsrael یعنی ”آپریشن اسرائیل“ کا نام دیا۔ یہ سائبر حملے اسرائیل کی طرف سے اطلاعاتی مہم شروع کئے جانے کے بعد کئے گئے۔ یاد رہے کہ بدھ کے روز اسرائیلی فوج کی ویب سائٹ کے ذریعے غزہ پٹی کے واقعات پر روشنی ڈالی جانے لگی۔

ہیکر گروپ ”اینونیمس“ نے اسرائیلی سائٹوں کو نشانہ بنایا

بس اور ٹرین میں تصام: 47 بچے جاں بحق

حادثے میں زخمی بچے ہسپتال میں زیر علاج ہیں

مصر کے جنوب میں ایک سکول بس ٹرین کی زد میں آنے سے درجنوں بچے ہلاک ہو گئے۔ حکام کے مطابق ہفتہ کو جنوبی علاقے منفالوت میں یہ واقعہ اس وقت پیش آیا جب ایک سکول بس ریلوے لائن کراس کرتے ہوئے ریل گاڑی کی زد میں آ گئی۔ ابتدائی اطلاعات کے مطابق بس میں چار سے چھ سال تک کی عمر کے تقریباً 60 بچے سوار تھے۔ ہلاکتوں کی تعداد 47 بتائی گئی ہے۔

صدر محمد مرسی نے متعلقہ وزراء کو متاثرہ خاندانوں کی معاونت کا حکم دیا ہے۔ مصر میں عموماً ریل کے ناقص نظام اور خراب انتظامی ڈھانچہ ملک میں ایسے حادثات کی ایک بڑی وجہ بتائی جاتی ہے۔ ادھر پاکستان نے مصر میں پیش آنے والے اس حادثے پر گہرے دکھ اور افسوس کا اظہار کیا ہے۔ ہفتہ کو وزارت خارجہ سے جاری ہونے والے بیان میں پاکستانی حکومت اور عوام کی طرف سے مصر کی حکومت اور ہلاک شدگان کے لواحقین سے تعزیت اور ہمدردی کا اظہار کرتے ہوئے زخمیوں کی جلد صحت یابی کے لیے دعا کی گئی ہے۔

مصر: سکول بس اور ٹرین کے تصام میں درجنوں بچے ہلاک

پہلے ٹیسٹ میں ویسٹ انڈیز کی جیت

بنگلہ دیش کے شہر میر پور کے شیر بنگلہ سٹیڈیم میں بنگلہ دیش اور ویسٹ انڈیز کے درمیان کھیلا جانے والا میچ ویسٹ انڈیز نے 77 رنز سے جیت لیا ہے۔ میچ کے آخری دن بنگلہ دیش کو جیتنے کے لیے 245 پینتالیس رنز کا ہدف ملا تھا لیکن اس کی پوری ٹیم 167 رنز بنا کر آؤٹ ہو گئی۔ ویسٹ انڈیز نے اپنی پہلی اننگز میں چندر پال کی شاندار ڈبل سنچری کی بدولت چار وکٹوں کے نقصان پر 527 رنز بنا ڈکلیئر کر دیا تھا۔ اس کے جواب میں بنگلہ دیش نے 556 رنز بنائے تھے۔ ویسٹ انڈیز دوسری اننگز میں صرف 273 رنز ہی بنا سکا اور بنگلہ دیش کو جیتنے کے لیے 245 رنز کا ایک نسبتاً آسان ہدف دیا۔ تاہم ویسٹ انڈیز کے فاسٹ بالر ٹینو بیسٹ نے تباہ کن بالنگ کا مظاہرہ کرتے ہوئے 24 رنز دے کر پانچ کھلاڑیوں کو آؤٹ کیا، جبکہ ویراسوامی پرمال نے 32 رنز دے کر تین وکٹیں حاصل کیں۔ روی رام پال کے حصے میں دو وکٹیں آئیں۔ بنگلہ دیش کے سات کھلاڑی 119 پر آؤٹ ہو گئے تھے لیکن محموداللہ اور سوہاگ غازی کے درمیان آٹھویں وکٹ کی 36 رنز کی شراکت نے بنگلہ دیش کی امیدوں کو ایک بار پھر سہارا دیا۔ لیکن اس کی آٹھویں اور نویں وکٹیں یکے بعد دیگرے گر گئیں جس سے ویسٹ انڈیز ایک بار پھر کھیل پر گرفت مضبوط کر لی۔

میرپور: پہلے ٹیسٹ میں ویسٹ انڈیز کی جیت

بھارت کے خلاف انگلینڈ کو فالو آن

بھارت کے خلاف پہلے کرکٹ ٹیسٹ میچ میں انگلینڈ کی ٹیم پہلی اننگز میں 191 رنز بنا کر آؤٹ ہونے کے بعد فالو آن کا شکار ہوگئی۔ بھارتی باؤلروں خصوصاً پراگیان اوجھا نے پانچ، ایشون نے تین جب کہ ظہیر خان اور یاددو نے ایک، ایک وکٹ حاصل کی۔ 

احمد آباد میں کھیلے جانے والے میچ کے تیسرے روز ہفتہ کو جب کھیل ختم ہوا تو مہمان ٹیم کو اننگز کی شکست سے بچنے کے لیے 219 رنز درکار تھے جب کہ میچ کے دو روز اور انگلینڈ کے تمام کھلاڑی ابھی باقی ہیں۔ بھارت نے ٹاس جیت کر پہلے کھیلتے ہوئے 521 رنز آٹھ کھلاڑی آؤٹ پر اپنی پہلی اننگز ختم کر دی تھی۔ چتیشور پجارا ناقابل تسخیر 206 رنز کے ساتھ نمایاں بھارتی بلے باز رہے جب کہ سہواگ نے شاندار 117 رنز بنائے۔

پہلا ٹیسٹ :بھارت کے خلاف انگلینڈ کو فالو آن

جرمنی سے شکست، پاکستان فائنل دوڑ‌ سے باہر

جوہربارو: جرمنی کے ہاتھوں 0-3 سے شکست کے بعد پاکستان سلطان جوہر بارو کپ کے فائنل کی دوڑ سے باہر ہوگیا۔

ٹیم اب اتوار کو برانز میڈل کے لیے آسٹریلیا کا سامنا کرے گی، جرمن سائیڈ کا فیصلہ کن معرکے میں بھارت سے مقابلہ ہوگا، لیگ کے آخری مقابلہ میں جرمن پلیئرز نے پاکستان کو آؤٹ کلاس کردیا، جرمنی اور آسٹریلیا کے پوائنٹس یکساں طور پر 9، 9 ہوئے تاہم بہتر گول اوسط کی بنیاد پر جرمن ٹیم نے فائنل میں جگہ بنالی، آسٹریلیا نے اپنے آخری مقابلے میں نیوزی لینڈ کو 5-1 سے شکست دی، نیوزی لینڈ کو میزبان اور دفاعی چیمپئن ملائیشیا سے ٹکرانا پڑیگا، ملائیشیا نے پہلے ہی فائنل میں نشست محفوظ کرانے والے بھارت کے خلاف اپنا آخری میچ 3-3 سے ڈرا کرلیا۔

جرمنی سے شکست، پاکستان فائنل دوڑ‌ سے باہر

سکریچ کارڈ کی فروخت پر ایکسائز ڈیوٹی لی جائے گی

اسلام آ باد: ایف بی آر نے سیلولر موبائل فون کمپنیوں اور دوسری ٹیلی کام کمپنیوں سے سکریچ کارڈ کے استعمال کے بجائے فروخت پر فیڈرل ایکسائز ڈیوٹی وصول کرنے کا اصولی فیصلہ کیا ہے۔

ایف بی آر کے سینئر افسر نے بتایا کہ یہ فیصلہ سپریم کورٹ آف پاکستان کے بھجوائے جانے والے ٹرانسپیرنسی انٹرنیشنل کے لیٹر پرطلب کی جانے والی رپورٹ پر کیا گیا تاہم حتمی فیصلہ سپریم کورٹ آف پاکستان کی ہدایات پر کیا جائیگا۔ ذرائع نے بتایا کہ ایف بی آر نے اس لیٹر پر تمام سیلولر موبائل فون کمپنیوں اور ٹیلی کام کمپنیوں کو خطوط ارسال کر دیے ہیں جن میں کمپنیوں سے کہا گیا ہے کہ 5 دن میں اپنے نکتہ نظر اور موقف سے آگاہ کریں۔

ذرائع نے بتایا کہ ٹرانسپیرنسی انٹرنیشنل کے لیٹر میں کہا گیا تھا کہ فیڈرل ایکسائز ڈیوٹی کارڈ کی فروخت کے بعد ہی ایف بی آر کو جمع ہونا چاہیے جس سے ایف بی آر کو اربوں روپے کا ریونیو حاصل ہوگا۔ ذرائع نے بتایا کہ کمپنیوں کے جواب ملنے پر رپورٹ تیار کرکے سپریم کورٹ میں جمع کرائی جائے گی اورعدالتی ہدایات پر عمل ہوگا تاہم ذرائع کے مطابق ایف بی آر کے پاس سکریچ کارڈ کے استعمال کے بجائے فروخت پر کمپنیوں سے ٹیکس وصول کرنے کے اختیارات ہیں۔

فون سکریچ کارڈ کی فروخت پر ایکسائز ڈیوٹی لی جائے گی، ایف بی آر کا اصولی فیصلہ

اسرائیلی بمباری سے 39 فلسطینی شہید

غزہ سٹی: غزہ میں اسرائیل کے فضائی حملوں میں مزید 11 فلسطینی شہید ہوگئے ہیں جس کے بعد گزشتہ 4 دنوں میں جام شہادت نوش کرنے والے فلسطینیوں کی تعداد 39 ہوگئی ہے۔ اسرائیلی طیاروں نے غزہ میں وزیراعظم ہاؤس، پولیس ہیڈ کوارٹر اور مسجدالرحمان سمیت متعدد سرکاری اور سیکیورٹی اداروں کی عمارتوں کو نشانہ بنایا۔ جبالیہ اور مغازی میں فلسطینیوں کے کیمپ پر ہونے والے حملے میں 11 افراد شہید ہوگئے جن میں ایک 5 سالہ بچی بھی شامل ہے۔ فلسطین کے وزیراعظم ہاؤس پر ایک ایسے وقت میں حملہ کیا گیا کہ جب فلسطینی کابینہ اور مصر کے وزیراعظم ہشام قندیل کے درمیان اسی مقام پر آج صبح مذاکرات ہونے کی توقع تھی جبکہ اس کے بعد تیونس کے وزیر خارجہ کا دورہ متوقع تھا۔ اسرائیلی حکام کے جاری کردہ بیان کے مطابق اسرائیلی فوج نے جمعہ اور ہفتہ کی درمیانی شب سے اب تک غزہ پر 180 سے زائد حملے کئے ہیں۔

اسرائیلی جارحیت پر غزہ کے مسلمانوں سے اظہار یکجہتی کے لئے خطے کے ممالک کی جانب سے سفارتی میدان میں بھی تیزی آگئی ہے۔ تیونس کے وزیر خارجہ رفیق عبدالسلام نے غزہ میں حماس رہنماؤں سے ملاقات کے بعد میڈیا سے بات کرتے ہوئے مطالبہ کیا کہ غزہ کا محاصرہ فوری طور پر ختم کیا جائے۔ حماس کے سربراہ خالد مشعل اور ترک وزیراعظم طیب رجب اردگان مصر کے دارالحکومت قاہرہ پہنچے ہیں۔ جبکہ قطر کے امیر الشیخ حمد بن خلیفہ آل ثانی کی آمد بھی متوقع ہے۔

دوسری جانب پاکستان نے بھی اسرائیلی جارحیت کی مذمت کرتے ہوئے اسے بین الاقوامی قوانین کی خلاف ورزی قرار دیا ہے جبکہ اقوام متحدہ کی سلامتی کونسل کے ہنگامی اجلاس میں بھی پاکستان کے مستقل مندوب مسعود خان نے شدید احتجاج کرتے ہوئے عالمی برادری سے اپنا کردار ادا کرنے کا مطالبہ کیا تھا۔

اسرائیلی بمباری سے 39 فلسطینی شہید