گردے کے مریض اور گرمیوں میں پانی کا استعمال

گردے میں پتھری کے مریضوں کو چاہیے کہ وہ گرمیوں میں زیادہ دیر تک دھوپ میں نہ رہیں۔ جسم سے پسینہ زیادہ خارج ہونے کی وجہ سے کسی بھی وقت گردہ فیل ہوسکتا ہے۔ گرمیوں میں گردوں کے امراض زیادہ شدید ہونے کا امکان ہوتا ہے۔ اس ضمن میں ہونے والی تحقیق میں مزید بتایا گیا ہے کہ گردے کے مریضوں کو گرمیوں میں زیادہ پانی پینا چاہیے تاکہ جسم میں پانی کی کمی واقع نہ ہو۔ 

امریکن فاونڈیشن فاریورالوجیک ڈیزیز کے زیر اہتمام ہونے والی اس تحقیق میں مزید بتایا گیا ہے جو لوگ فیلڈ میں کام کرتے ہیں، اگر وہ گرمیوں میں پانی کی مناسب مقدار نہیں لیتے تو ان کے گردے خراب ہونے کے امکانات میں ۶۵ فی صد تک اضافہ ہوسکتا ہے۔ منہ کے ذریعے پیا جانے والا پانی جسم میں جہاں پانی کی مقدار اور سطح کو نارمل رکھتا ہے وہاں گردوں کی حفاظت بھی کرتا ہے۔ 

کڈنی فاونڈیشن آف کینیڈا نے تو یہاں تک تجویز کیا ہے کہ ہر ایک گھنٹے بعد ایک گلاس پانی پیا جانا چاہیے تاکہ گردوں کی صفائی کا کام متواتر جاری رہے۔ 

تحقیقی رپورٹ میں گردوں میں پتھر بننے کی متعدد وجوہات بھی درج کی گئی ہیں مگر ان میں سب سے زیادہ زور پانی نہ پینے کی خطرناک عادت پر دیا گیا ہے۔ ماہرین نے کہا ہے کہ پانی واحد شے ہے جس سے گردے صحت مند رہتے ہیں۔